Është zhvilluar sot seanca paraprake ndaj Bojan Jevtiq, shef i operativës në pikën kufitare “Dheu i Bardhë”, i cili dyshohet për përfshirje në veprën penale të spiunazhit. Prokuroria Speciale e Republikës së Kosovës ka dorëzuar kërkesë zyrtare për caktimin e masës së paraburgimit ndaj tij.

Prokurori i rastit, Bekim Kodraliu, bëri të ditur se gjatë një aksioni të ndërmarrë ditën e djeshme në shtëpinë e të dyshuarit dhe në objekte të tjera përkatëse, janë siguruar prova materiale që e lidhin Jevtiqin me aktivitetet e dyshuara.

“Provat e siguruara kanë fuqizuar dyshimin tonë se i pandehuri ka qenë i përfshirë në veprime që cenojnë rendin kushtetues të Republikës së Kosovës, zyrtarët dhe institucionet e saj”, u shpreh prokurori Kodraliu.

Sipas Kodraliut, Jevtiqi nuk ka ofruar shpjegim të besueshëm për burimin e të hollave të gjetura, të cilat dyshohet se janë përfituar përmes veprimtarive të ndërlidhura me spiunazhin.

“Po, sot Prokuroria Speciale ka paraqitur kërkesë për caktimin e masës së paraburgimit ndaj të pandehurit Bojan Jevtiq, i dyshuar për veprën penale të spiunazhit. Kemi siguruar prova të mjaftueshme materiale dhe personale në bazë të së cilave kemi vërtetuar dyshimin se i njëjti është duke u marrë me aktivitet të kundërligjshë, që cënon rendin juridik dhe kushtetues të Republikës së Kosovës. Janë dokumente konfidenciale të lëshuara nga Policia e Kosovë të cilat kanë të bëjnë me sigurinë, rendin juridik”, ka deklaruar prokurori special.